Bátasmiðja Guðmundar(Heitir í dag Sómabátar) var stofnuð árið 1979 af Guðmundi Lárussyni skipasmið.

Guðmundur sem smíðaði sinn fyrsta bát árið 1959 hóf smíði á plastbátum árið 1977 og má þar segja að sú ákvörðun Guðmundar hafi lagt grunninn að Sómabátunum sem allir sjómenn þekkja í dag.

Árið 1979 var grundvöllurinn fyrir stofnun fyrirtækis utan um Sómabátana orðinn að veruleika, og stofnaði Guðmundur þá Bátasmiðju Guðmundar.
Upphaflega var byrjað í litlu húsnæði á Helluhrauni í Hafnarfirði og þar náðum við að smíða mest 30 báta á ári og 1986 var farið í 1000 m2 hús á Eyrartröðinni. Mest var framleitt 87 til 89, 50 báta á ári. Eftir að hafa þróað og byggt Sóma í rúmlega 20 ár og smíðað tæplega 400 báta tók Óskar Guðmundsson sonur Guðmundar við Bátasmiðju Guðmundar árið 1999, og verður það að teljast til happs fyrir aðdáendur Sóma bátana því Óskar hefur starfað við Bátasmiðjuna óslitið síðan árið 1983 en áður hafði hann verið í smiðjunni með skóla og þekkti framleiðsluferlið á bátunum frá A til Ö.

Þess má geta að ástæða velgengi Sóma hlýtur að teljast sú að allt frá byrjun hafa Guðmundur og Óskar ásamt starfsmönnum Bátasmiðjunnar lagt sig fram við að prófa framleiðslu sína sjálfir. Það er viðtekin venja í Bátasmiðjunni að hlutirnir geta litið vel út á teikniborðinu en ekkert jafnast á við áratuga reynslu þar sem menn þekkja aðstæðurnar af eigin raun.

Hjá Sómabátum starfa starfsmenn með mikla reynslu bæði af sjómennsku sem og smíði báta, rafmagns, stálsmíði, álsmíði og að sjálfsögðu er þarna komin saman ein mesta reynsla á Íslandi á sviði smíði úr trefjaplasti, en allir Sóma bátar eru smíðaðir úr trefjaplasti og af árekstrarprófunum sem framkvæmdar voru af óháðum aðilum á Sóma bátnum Ásþóri RE-395 þá verður að segjast að styrkur Sóma er einstakur, en þarna er vitnað í þegar óprúttnir náungar stálu Ásþóri RE-395 úr Reykjavíkurhöfn og sigldu bátnum á miklum hraða (32 sjómílur) á hafnargarðinn í Reykjavíkurhöfn. Stefnið á Ásþóri brotnaði en báturinn sökk ekki og var hífður úr sjónum og lagaður hjá Bátasmiðju Guðmundar. Skipt var um stefni og sést ekki að báturinn hafi lent í árekstri við hafnargarð.

Sómabátar framleiða margar tegundir, má þar nefna:

Sóma Julla, Sómi 600, Sómi 700, Sómi 870 og Sómi 990

Frá stofnun Bátasmiðju Guðmundar hafa rétt tæplega 450 Sómabátar litið dagsins ljós og eru þeir staðsettir á Íslandi, Færeyjum, Grænlandi, Noregi og víðar.

Sómi hefur alltaf verið þekktur fyrir hraðskreiða báta, jafnt tóma sem lestaða, og hefur það verið keppikefli Bátasmiðjunnar að viðhalda þeirri frægð.

Margir líta til Sóma þegar talað er um svokallaða “hraðfiskibáta”, gamli sjarmörinn, trillukarlinn með húfuna og pípuna, plammandi á eikartrillunni sinni á miðin á 3 mílna hraða er að hverfa, kvótakerfi okkar íslendinga hefur lagt þennan trillukarl á hilluna og gert útgerðarmönnum á smábátum hér við land ljóst að hafa skal hraðar hendur við fiskeríið, nú dugir ekkert droll.

Sómabátarnir eru hraðskreiðustu fiskibátar á Íslandi og þessu til sönnunar tók Óskar Guðmundsson sig til í Mai árið 2001, hnykklaði vöðva og hestöfl og sló hraðamet á smábát frá Íslandi til Færeyja. Sjávarútvegssýning í Rúnavík í Færeyjum var áfangastaðurinn, og var lagt af stað á Sóma 960 bát 12 Mai ásamt Valdimar Long bátasmið og Grímseyingnum Sigurði Bjarnasyni og í stuttu máli tók ferðin aðeins 15 tíma, yfir hafið frá Vestmannaeyjum til Færeyja þrátt fyrir að vera með helmingi meira eldsneyti um borð en þurfti í þessa ferð var meðalhraðinn 25 mílur. Eftir sýninguna í Færeyjum var haldið af stað heim í vondu veðri og tók siglingin til Neskaupsstaðar rúma 14 tíma og var meðalhraðinn þar aðeins 14 sjómílur. Síðan var siglt norður fyrir land og endað í Grímsey og báturinn afhentur eiganda sem fyrir á 5 Sóma af mismunandi stærðum. Ca helmingur eyjaskeggja mætti á kæjann og þáðu veitingar og flugu þar margar skemmtilegar sögur eins og Grímseyingum er einum lagið að segja.

Nokkuð hefur borið á að aðrir bátaframleiðendur hafa reynt að slá þessu meti við en engum hefur tekist að sanna með óyggjandi hætti að þetta met sé slegið, og meðan svo er verður þetta met að teljast staðið hjá Sóma.

Í dag eru Sómabátar staðsettir að Kistumel 20 116, Reykjavík við rætur Esju.

Sómabátar eru smíðaðir undir sama húsi og Víkingbátarnir, Bátaverksmiðjan er sem stendur í 2600fm2 húsnæði.

Netfang: sala@vikingbatar.is